అంబరాన్నంటిన సద్దులు

అక్కచెల్లెళ్ల కాలి గజ్జెల సవ్వళ్లు.. పిల్లాజెల్లా సందడితో ఊరూరా బతుకమ్మ నెత్తుకొని గడపలన్నీ కదలినయ్‌.. వాకిళ్లన్నీ పూదోటలైనయ్‌.. కూడళ్లలో తీరొక్క విరుల జాతరలు జరిగినయ్‌.. గుడులు, బడులు హోరెత్తినయ్‌.. చెరువూ.. గట్టూ సందడిగ మారినయ్‌.. చెట్టూపుట్టా పులకించిపోయినయ్‌.. పల్లె, పట్నం తేడా లేకుండా ఆడబిడ్డల ఆటపాటలతో మార్మోగినయ్‌.. నింగీనేలా మురిసేలా గాజుల సప్పట్లు.. ఇంపైన పాటలతో సద్దుల బతుకమ్మ సంబురాలను ఆడబిడ్డలు అంబరాన్నంటేలా జరుపుకొన్నారు.

బతుకునిచ్చే బతుకమ్మను అందరొక్కచోట చేరి కొలిచారు. తొమ్మిది రోజుల పాటు భక్తిశ్రద్ధలతో పూజించిన గౌరమ్మను చివరి రోజున గంగమ్మ ఒడికి సాగనంపి వాయినాలను ఇచ్చిపుచ్చుకొని పాటల నెమరేతతో ఇండ్లకు కదిలారు. తెలంగాణ నుదుట సిందూరం.. ఆడబిడ్డల ఆత్మగౌరవ సంరంభం.. సాంస్కృతిక వైభవం.. ప్రకృతిని ఆరాధించే పర్వమైన ‘పెద్ద బతుక మ్మ’ ఉత్సవాలు.. ఎంగిలిపూలతో మొదలై ఎన్నో మధురానుభూతులను ‘సద్దులు’ కట్టిచ్చి ఆదివారం ఘనంగా ముగిసినయ్‌.