Chittem Rammohan Reddy | రైతు భరోసా అందని రైతుకు భరోసా ఎవరు..?.. కాంగ్రెస్‌ సర్కారుపై మాజీ ఎమ్మెల్యే చిట్టెం రామ్మోహన్‌రెడ్డి నిప్పులు

Chittem Rammohan Reddy | ఊట్కూర్, అక్టోబర్ 17 : మక్తల్‌–నారాయణపేట మధ్య నాలుగు లైన్ల రహదారి నిర్మాణం అంశాన్ని ప్రజల్లోకి తీసుకెళ్లడంతోపాటు, స్థానిక సమస్యలను తెలుసుకునేందుకు మాజీ ఎమ్మెల్యే చిట్టెం రామ్మోహన్‌రెడ్డి చేపట్టిన పాదయాత్ర ఉట్కూరు మండలంలో కొనసాగింది. పాదయాత్రలో భాగంగా శనివారం 11:30 గంటలకు మల్లేపల్లికి చేరుకున్న ఆయనకు అభిమానులు, పార్టీ శ్రేణులు ఘన స్వాగతం పలికారు. రహదారి సమస్యతోపాటు ప్రజలు ఎదుర్కొంటున్న ఇబ్బందులను తెలుసుకుంటూ ఆయన ముందుకు సాగారు.

ఈ సందర్భంగా మహిళా కూలీలు, రైతులు చిట్టెం రామ్మోహన్‌రెడ్డిని కలిసి తమ సమస్యలను వివరించారు. రైతు భరోసా అందడం లేదని, రైతుబీమా నిలిచిపోయిందని, విద్యుత్‌ సమస్యలతో సాగు చేసిన పంటలు కళ్లముందే ఎండిపోతున్నాయని ఆవేదన వ్యక్తం చేశారు. రైతుల కష్టాలను విన్న ఆయన కాంగ్రెస్‌ ప్రభుత్వ తీరుపై విమర్శలు గుప్పించారు. ‘రైతు భరోసా అందని రైతుకు భరోసా ఎవరు..? కళ్లముందే పంటలు ఎండిపోతుంటే రైతన్నకు దిక్కెవరు..?’ అంటూ ప్రభుత్వాన్ని ప్రశ్నించారు.