కార్ల తయారీ పరిశ్రమలకు హైదరాబాద్ బెస్ట్ ప్లేస్: సీఎం రేవంత్

హైదరాబాద్: కార్ల తయారీ పరిశ్రమ స్థాపించడానికి హైదరాబాద్ అనువైన ప్రాంతమని సీఎం రేవంత్ రెడ్డి హ్యూందాయ్ ఇండియా సంస్థకు తెలిపారు. తెలంగాణలో తయారీ రంగాన్ని ప్రోత్సహించేందుకు ప్రభుత్వం అన్ని విధాలా సహకరించడానికి సిద్ధంగా ఉందని చెప్పారు. శుక్రవారం (అక్టోబర్ 16) ఎంసీఆర్ హెచ్ఆర్‌డీ బోధి పెవిలియన్‌లో సీఎం రేవంత్‎తో హ్యుందాయ్ మోటార్స్ ఇండియా ఇంజినీరింగ్ (HMIE) మేనేజింగ్ డైరెక్టర్ చాంగ్యోన్ చో నేతృత్వంలోని ప్రతినిధి బృందం సమావేశమైంది.

“భౌగోళికంగా తెలంగాణ దేశంలో మధ్య భాగంలో ఉంది. దేశంలోని ఆరు ప్రధాన మెట్రో నగరాల్లో హైదరాబాద్ కాస్మోపాలిటన్ నగరంగా, అత్యంత సురక్షితమైనదిగా, జీవించేందుకు అత్యంత అనుకూలమైన నగరంగా గుర్తింపు పొందింది” అని ఈ సందర్భంగా సీఎం ఇక్కడి సానుకూల పరిస్థితులను వివరించారు.