క్యాన్సర్‌ను ఓడిద్దాం

క్యాన్సర్‌ అంటే ఒకప్పుడు చాలామందిలో ప్రాణభయాన్ని కలిగించే వ్యాధి. అయితే వైద్యరంగంలో వచ్చిన విప్లవాత్మక మార్పులతో నేడు అనేక రకాల క్యాన్సర్లను సమర్థంగా నియంత్రించడంతోపాటు, కొన్ని క్యాన్సర్లను పూర్తిగా నయం చేసే అవకాశం కూడా ఉంది.ముఖ్యంగా వ్యాధిని ప్రారంభ దశలో గుర్తించి, సరైన చికిత్స అందిస్తే కోలుకునే అవకాశాలు గణనీయంగా మెరుగుపడతాయి. ఒకప్పుడు ప్రధానంగా శస్త్రచికిత్స, కీమోథెరపీ, రేడియేషన్‌ చికిత్సలపైనే ఆధారపడిన వైద్యం.. నేడు ఇమ్యునోథెరపీ, టార్గెటెడ్‌ థెరపీ, ప్రెసిషన్‌ మెడిసిన్‌, రోబోటిక్‌ సర్జరీ లాంటి ఆధునిక విధానాలతో మరింత ముందుకు సాగుతున్నది.

పొగాకు వినియోగం, మద్యపానం, అధిక బరువు, శారీరక శ్రమ లేకపోవడం, అనారోగ్యకరమైన ఆహారపు అలవాట్లు, కొన్ని వైరస్‌ సంక్రమణలు క్యాన్సర్‌ ముప్పును పెంచుతాయి. అయితే ఆరోగ్యకరమైన జీవనశైలిని పాటించడం, అవసరమైన టీకాలు వేయించుకోవడం, వైద్యుల సూచనల మేరకు పరీక్షలు చేయించుకోవడం ద్వారా కొన్ని క్యాన్సర్ల ప్రమాదాన్ని తగ్గించవచ్చు.