ప్రైవేటు మెడికల్, ఇంజనీరింగ్ కాలేజీ ఫీజులపై సుప్రీం సీరియెస్: విద్యార్థులకు ఊరటనిచ్చే తీర్పు

ప్రైవేట్ మెడికల్, ఇంజనీరింగ్ కాలేజీలు కోర్సు మధ్యలో ఏకపక్షంగా ఫీజులు పెంచడంపై సుప్రీంకోర్టు తీవ్రంగా స్పందించింది. ఉన్నత విద్యను అభ్యసించే విద్యార్థులు ఫ్యామిలీకి ఆర్థిక భారం కాకుండా ఉండేందుకు అత్యున్నత ధర్మాసనం కీలక తీర్పు వెలువరించింది. విద్యార్థులు కాలేజీలో ప్రవేశం పొందే ముందే ఆయా కోర్సుల పూర్తి కాలానికి సంబంధించిన ఫీజు ఎంత ఉంటుందనేదానిపై స్పష్టమైన వివరాలు ఇవ్వాలని స్పష్టం చేసింది. జాయిన్ అయిన తర్వాత ఫీజులు పెంచడాన్ని తీవ్రంగా తప్పుబట్టిన కోర్టు.. కేవలం అత్యవసర, అసాధారణ పరిస్థితుల్లో మాత్రమే ఫీజుల పెంపునకు అవకాశం ఉంటుందని తేల్చి చెప్పేసింది. ఈ తీర్పు విద్యార్థులకు భారీ ఊరటగా నిలుస్తోంది.

పశ్చిమ బెంగాల్‌లోని డాక్టర్ బి.సి. రాయ్ ఇంజనీరింగ్ కాలేజీలో 2023-27 బ్యాచ్‌కు చెందిన బీటెక్ విద్యార్థులపై విధించిన 37 శాతం ఫీజు పెంపును, కొత్త డెవలప్‌మెంట్ ఫీజును సవాలు చేస్తూ దాఖలైన పిటిషన్‌పై విచారణ జరిపిన సుప్రీంకోర్టు ఈ తీర్పును వెలువరించింది. కోర్సు మధ్యలో ఫీజులు పెంచడం వల్ల విద్యార్థులు, వారి కుటుంబాలు తీవ్ర ఆర్థిక ఇబ్బందులను ఎదుర్కొంటాయని ఫీజులపై అనిశ్చితి ఉండకూడదని కోర్టు నొక్కిచెప్పింది.