రిలయన్స్, బ్లింకిట్, జొమాటోలపై ఫుడ్ సేఫ్టీ కొరడా.. ఎక్స్‌పెయిరీ అయిన వస్తువుల అమ్మకాలపై కేసులు!

ప్రముఖ రిటైల్ బ్రాండ్లు, దిగ్గజ క్విక్ -కామర్స్ సంస్థల పేర్లు.. కాలం చెల్లిన ఆహార పదార్థాల అక్రమ దందాలో వెలుగులోకి రావడం దేశవ్యాప్తంగా సంచలనం సృష్టిస్తోంది. వినియోగదారులకు నాణ్యమైన సేవలు అందిస్తున్నామని గొప్పలు చెప్పుకునే దిగ్గజ కంపెనీల లోపల జరుగుతున్న మోసం గుట్టును మహారాష్ట్ర ఫుడ్ అండ్ డ్రగ్ అడ్మినిస్ట్రేషన్(FDA) అధికారులు రట్టు చేశారు. ఈ వ్యవహారంలో రిలయన్స్ కన్స్యూమర్ ప్రొడక్ట్స్ డైరెక్టర్‌తో పాటు 10 మందిపై క్రిమినల్ కేసులు నమోదవడం తీవ్ర చర్చనీయాంశమైంది.

మహారాష్ట్రలోని థానే, పూణే జిల్లాల్లో FDA అధికారులు ఏకకాలంలో నిర్వహించిన మెరుపు దాడితో ఈ భారీ కుంభకోణం బయటపడింది. మార్కెట్లో అమ్మేందుకు వీలులేని, పాడైపోయిన, గడువు ముగిసిన, వినియోగదారులు తిరస్కరించిన ఆహార ఉత్పత్తులను ధ్వంసం చేయాల్సి ఉండగా.. వాటిని కొందరు అక్రమంగా దారి మళ్లించారు. ఈ దందాలో భాగంగా సుమారు 48 లక్షల రూపాయల విలువైన ఆహార పదార్థాలను అధికారులు స్వాధీనం చేసుకోవటం సంచలనంగా మారింది.