BRS ఆస్తులు రూ.1,509 కోట్లు.. ఒక్క ఏడాదిలోనే ఖర్చు రూ.162 కోట్లు

హైదరాబాద్: దేశంలోనే రిచెస్ట్ రీజనల్ పార్టీల్లో ఒకటైన బీఆర్ఎస్ పార్టీ ఆస్తుల వివరాలు వెల్లడయ్యాయి. బీఆర్ఎస్‎కు వివిధ రూపాల్లో మొత్తం రూ.1,509 కోట్ల ఆస్తులున్నాయి. వివిధ బ్యాంకుల్లో నగదు రూపంలో రూ.1,431 కోట్లు, రుణాలు, అడ్వాన్సులు, డిపాజిట్ల రూపంలో రూ.11.77 కోట్లు, భవనాలు, ఇతరత్రా భౌతిక వస్తు రూపంలో రూ.66.26 కోట్ల ఆస్తులున్నట్లు కేంద్ర ఎన్నికల సంఘానికి ఆ పార్టీ సమర్పించిన 2025-26 ఫైనాన్షియల్ ఇయర్ ఆడిట్ రిపోర్ట్ ద్వారా వెల్లడైంది. ఈ ఆస్తుల వివరాలు 2026, మార్చి 31 నాటికి సంబంధించినవి.

2025-26 సంవత్సరంలో గులాబీ పార్టీ వివిధ రూపాల్లో రూ.114 కోట్లు ఆర్జించింది. ఇందులో డొనేషన్ల రూపంలో రూ.16.44 కోట్లు, రుసుములు చందాల రూపంలో రూ.27.60 లక్షలు, డిపాజిట్లపై వడ్డీలు, అద్దెలు తదితర మార్గాల్లో రూ.97.76 కోట్ల ఆదాయం వచ్చినట్లు ఆ పార్టీ తెలిపింది.