ఇదిగో కేసీఆర్‌ ముందుచూపు.. కరువులోనూ నీళ్లు పారేలా ప్రణాళిక

జగిత్యాల, అక్టోబర్‌ 14 (నమస్తే తెలంగాణ) : ‘కాళేశ్వరం ఎందుకు? లక్ష కోట్లు ముంచిండ్రు, పనికిరాని ప్రాజెక్టు, రివర్స్‌ పంపింగ్‌ ఎందుకు? అనవసరంగా నాశనం చేసిండ్రు? వాటితోటి పైసా లాభం లేదు’ అని కాంగ్రెస్‌ నాయకులు, ప్రజాప్రతినిధులు మూడేండ్లుగా నిత్యం చెప్పే సోదీ అందరికీ తెలిసిందే. ఎస్సారెస్పీ పునరుజ్జీవ పథకం ఎందుకు? వరద కాలువ నుంచి కాకతీయ కెనాల్‌కు లింక్‌ కాలువలు ఎందుకు? ఆ పథకాల వల్ల, పనుల వల్ల ప్రజలకు, ముఖ్యంగా రైతులకు ఎట్లా లాభం అవుతుందన్నది ఇప్పుడు ప్రత్యక్షంగా అనుభవంలోకి వచ్చింది. 122 కిలోమీటర్ల పొడవునా ఒక్క తూము లేకుండా, నిశ్చలంగా, నిలబడిపోయిన వరద కాలువకు మాజీ సీఎం కేసీఆర్‌..

ఎక్కడికక్కడ తూములు ఏర్పాటు చేసి, వరద కాలువ నుంచి కాకతీయ కాలువకు లింక్‌ కెనాల్‌ను అనుసంధానం చేయడంతో కరువు కోరలు చాచుతున్న వేళ కాకతీయ ఆయకట్టు చివరి రైతుల పొలాలకు సైతం నీళ్లు వెళ్లేందుకు మార్గం సుగమమైంది. జగిత్యాలతోపాటు కరీంనగర్‌, పెద్దపల్లి జిల్లాల్లోని 24 డిస్ట్రిబ్యూటరీల పరిధిలోని ఆయకట్టు రైతుల పొలాలకు ఈ నీటిని అందించే పరిస్థితి ఏర్పడింది. కేసీఆర్‌ ముందు చూపుతో ఇంత కరువు కాలంలో, ప్రాజెక్టుల్లో నీటి లభ్యత అతి తక్కువ ఉన్నప్పటికీ చివరి ఆయకట్టు భూములకు నీరందుతుండటంతో రైతుల్లో ఆనందం వ్యక్తమవుతున్నది.