యాసంగి సాగు బంద్‌

అనుకున్నదంతా అయ్యింది! సర్కార్‌ చేతులెత్తేసింది!! నదులు ప్రవాహాలతో హోరెత్తినప్పుడు చుక్క నీరెత్తకుండా ఆంధ్రా చంద్రబాబు కోసం కింది రాష్ర్టానికి వాడుకోమని వదిలేసి.. ఇప్పుడు తన వైఫల్యాన్ని ఎల్‌ నినో పైకి నెట్టేస్తున్నది రేవంత్‌ సర్కార్‌. భజన మీడియా దానికి చిడతలు వాయిస్తున్నది. బహుశా దేశ చరిత్రలో సొంత రాష్ట్రంలో పారే నీటిని పక్క రాష్ర్టానికి దానమిచ్చి ఇంతటి ద్రోహానికి పాల్పడిన ప్రభుత్వం ఇంతవరకు ఎక్కడా ఉండి ఉండదు.

ఇటు కాళేశ్వరం బాగు చేసి నీటిని ఎత్తి పోయకుండా ఉత్తర తెలంగాణను, అటు అర కిలోమీటర్‌ పాలమూరు-రంగారెడ్డి ప్రాజెక్టు పనులు పూర్తి చేయకుండా దక్షిణ తెలంగాణను ఈ సర్కార్‌ నిలువునా ముంచింది. నీళ్లన్నీ వెళ్లిపోయాక, అంతా అయిపోయాక పాలమూరు పంపులు నడిపి నాటకానికి తెర తీసింది. మనకు హక్కుభుక్తమైన నదుల జలాలను గురువు కోసం ధారపోసింది. క్యాబినెట్‌లో ఉన్న ఏ ఒక్క మంత్రీ నోరెత్తలేదు.