Eenadu ·
Railway Track Blast: ప్యాసింజర్ రైలు వెళ్లిన కొన్నినిమిషాలకే భారీ పేలుడు.. భారత్‌-పాక్‌ సరిహద్దులో ఘటన
Railway Track Blast | ఇంటర్నెట్‌డెస్క్‌: భారత్‌-పాకిస్థాన్ సరిహద్దులో భారీ పేలుడు సంభవించింది. రాజస్థాన్‌లోని శ్రీగంగారామ్ జిల్లాలో మంగళవారం రాత్రి జరిగిన ఈ ఘటనలో రైల్వేట్రాక్ దెబ్బతిన్నది (Railway track in Rajasthan). ప్రయాణికుల రైలు వెళ్లిన నిమిషాల వ్యవధిలో పేలుడు చోటుచేసుకోవడం తీవ్ర ఆందోళన రేకెత్తించింది. దీంతో అనూప్‌గఢ్‌- సూరత్‌గఢ్‌ మధ్య రైళ్ల రాకపోకలను అధికారులు తాత్కాలికంగా నిలిపివేశారు.
ఈ రైల్వే ట్రాక్‌పై 50 జీబీ పాయింట్ సమీపంలో రాత్రి సమయంలో పేలుడు జరిగింది. దాంతో ట్రాక్‌కు ఆధారంగా ఉండే రెండు కాంక్రీట్ పిల్లర్లు దెబ్బతిన్నాయి. అక్కడ రెండు అడుగుల లోతు గుంత ఏర్పడింది. పేలుడు శబ్దం వినిపించిందని సమీప ప్రాంత ప్రజలు మీడియాకు వెల్లడించారు. ఈ ఘటనతో వెంటనే భద్రతా బృందాలు రంగంలోకి దిగాయి. యాంటీ టెర్రరిజం, బాంబ్ డిస్పోజల్ స్వ్కాడ్‌ ఘటనా స్థలానికి చేరుకున్నాయి.