12 గంటల్లో ఓట్ల లెక్కింపు పూర్తి చేయాలి

కలెక్టర్లకు రాష్ట్ర ఎన్నికల సంఘం ఆదేశాలు ఏర్పాట్లపై సమీక్ష మధ్యాహ్నం 3 గంటల తర్వాత ఎంపీటీసీ స్థానాల తొలి ఫలితాలు వెలువడే అవకాశం

ఈనాడు, అమరావతి: రాష్ట్రంలో ఎంపీటీసీ, జడ్పీటీసీల ఓట్ల లెక్కింపునకు రాష్ట్ర ఎన్నికల సంఘం మార్గదర్శకాలు జారీ చేసింది. శనివారం ఉదయం 8 గంటలకు లెక్కింపు ప్రారంభించి రాత్రి 8 గంటల్లోపు పూర్తి చేయాలని కలెక్టర్లు, జిల్లా ఎన్నికల అధికారులను ఆదేశించింది. పరిషత్‌ ఎన్నికల ఓట్ల లెక్కింపు నేపథ్యంలో జిల్లాల్లో చేసిన ఏర్పాట్లపై ఎస్‌ఈసీ పునేఠా శుక్రవారం సమీక్షించారు. వర్షాల కారణంగా మున్సిపల్‌ ఓట్ల లెక్కింపులో జాప్యమైందని.. పరిషత్‌ ఓట్ల లెక్కింపును గడువులోగా పూర్తి చేయగలమన్న ఆశాభావాన్ని పలువురు అధికారులు వ్యక్తం చేశారు. లెక్కింపు ప్రారంభించిన తర్వాత 12 గంటల్లో పూర్తి చేసి ఫలితాలు ప్రకటించాలని ఎస్‌ఈసీ ఆదేశించారు.