ఆటోవాలా బతుకులు ఆగమాగం

ఒకప్పుడు ఆటో నడిపితే.. కుటుంబానికి నాలుగు మెతుకులు దొరికేవి.. కానీ..కాంగ్రెస్‌ ప్రభుత్వం కొలువుదీరాక ఆటో డ్రైవర్ల బతులు దుర్భరమయ్యాయి. ఉచిత బస్సు స్కీంతో ఉపాధి కరువై.. జీవితం ఆగమై.. ఆర్థిక కష్టాలు తాళలేక.. తనువు చాలిస్తున్నాడు డ్రైవరన్న. రాష్ట్రంలో ఇప్పటి వరకు ఆర్థిక ఇబ్బందులతో 350 మందికి పైగా ఆటో డ్రైవర్లు ఆత్మహత్యలు చేసుకోవడం ఆందోళన కలిగించే అంశం. ఈ చావులకు కాంగ్రెస్‌ సర్కారే కారణమని ఆటో డ్రైవర్లు ఆరోపిస్తున్నారు. 2023లో ఎన్నికల ప్రచారంలో పాల్గొన్న రాహుల్‌ గాంధీ.. డ్రైవర్ల సమస్యలు తెలుసుకున్నారు.

అధికారంలోకి వస్తే.. సమస్యలు పరిష్కరించడమే కాదు.. ఏడాదికి రూ. 12 వేలు అందిస్తామని చెప్పుకొచ్చారు. తీరా.. కాంగ్రెస్‌ ప్రభుత్వం కొలువుదీరాక..తన నైజాన్ని ప్రదర్శించింది..హామీలు విస్మరించింది..ఇప్పుడు రాహుల్‌ గాంధీ నగరానికి వచ్చిన సందర్భంగా ఆటోనగర్‌ పేరుతో కొత్త రాగం అందుకుంటున్నది. క్యూర్‌ పరిధిలో 2 లక్షలకు పైగా ఆటో డ్రైవర్లు ఉంటే.. కేవలం 2వేల మందికే ఇండ్లు ఇస్తామని ప్రభుత్వం చెప్పడం..రాజకీయ కుట్ర అని..దుర్మార్గమేనని అంటున్నారు ఆటో డ్రైవర్లు. ఇది కూడా ఏడాదికి 12వేల హామీ లాంటిదేనని అంటున్నారు.