ఆయుష్మాన్ భారత్‌లో AI టెక్నాలజీ.. వేగంగా హెల్త్ ఇన్సూరెన్స్ క్లెయిమ్స్ సెటిల్‌మెంట్!

దేశ హెల్త్ కేర్ రంగంలో డిజిటల్ టెక్నాలజీ కీలక మార్పులకు శ్రీకారం చుట్టుతోంది. ముఖ్యంగా ప్రపంచంలోనే అతిపెద్ద ప్రభుత్వ ఆరోగ్య భద్రతా పథకమైన ఆయుష్మాన్ భారత్, ఆయుష్మాన్ భారత్ డిజిటల్ మిషన్ అమలులో AI, ఆధునిక సాంకేతికతను జోడించి సేవలను మరింత మెరుగుపరిచేందుకు కేంద్రం సిద్ధమైంది. నేషనల్ హెల్త్ అథారిటీ చీఫ్ ఎగ్జిక్యూటివ్ ఆఫీసర్ డాక్టర్ సునీల్ కుమార్ బర్న్వాల్ స్పష్టం చేస్తూ.. ఆరోగ్య రంగానికి వెచ్చించే ప్రతి రూపాయి ప్రజలకు మెరుగైన వైద్యం అందేలా ఉపయోగపడాలని, టెక్నాలజీ, డేటా, ఏఐ ద్వారా నిర్ణయాలు మరింత వేగంగా, కచ్చితంగా అమలవుతాయని పేర్కొన్నారు.

టెక్నాలజీ పురోగతిలో భాగంగా ఇన్సూరెన్స్ క్లెయిమ్‌ల సెటిల్‌మెంట్ ప్రక్రియను మరింత వేగవంతం చేయనున్నారు. 'ఆటో-అజ్యుడికేషన్' ద్వారా క్లెయిమ్‌ల ప్రాసెసింగ్ సమయం, నిర్వహణ ఖర్చులు తగ్గనున్నాయి. అలాగే నేషనల్ యాంటీ ఫ్రాడ్ యూనిట్ ద్వారా వైద్య రంగంలో జరిగే మోసాలను అరికట్టడం, పారదర్శకతను పెంచడంపై ప్రత్యేక దృష్టి సారించారు. దీనివల్ల అనర్హులకు నిధులు చేరకుండా అసలైన పేదలకు సకాలంలో వైద్య సాయం అందుతుంది.