అగ్గువకు ఐడీబీఐ!

న్యూఢ్లిలీ: కెనడాకు చెందిన ఫెయిర్‌ఫాక్స్‌ ఫైనాన్షియల్‌ హోల్డింగ్స్‌కు రూ. 52,878 కోట్లకు ఐడీబీఐ బ్యాంక్‌ను విక్రయించే ప్రక్రియలో అనేక అనుమానాస్పద అంశాలు ఉన్నాయని బిజినెస్‌ వరల్డ్‌ పత్రిక సంచలన కథనాన్ని ప్రచురించింది. మొదట ఫెయిర్‌ఫాక్స్‌తో పాటు మరో సంస్థ సమర్పించిన సీల్డ్‌ బిడ్లు, రహస్యంగా నిర్ణయించిన కనీస రిజర్వ్‌ ధర రూ. 94.42 కంటే చాలా తక్కువగా వచ్చాయి. ఫెయిర్‌ఫాక్స్‌ తొలుత ఒక్కో షేరుకు రూ. 75 మాత్రమే కోట్‌ చేసింది. దీంతో అధికారులు అసాధారణమైన నిర్ణయం తీసుకున్నారు.

కనీసం రిజర్వ్‌ ధరను రూ. 75.99కు తగ్గించారు. అయితే ఈ నిర్ణయాన్ని బహిరంగంగానే తీసుకున్నట్టు చూపించారు. ఫెయిర్‌ఫాక్స్‌తో పాటు మరో బిడ్డర్‌ను కొత్తగా బిడ్లు సమర్పించాలని కోరారు. అయితే ఆ రెండో బిడ్డర్‌ పేరును వెల్లడించలేదు. భద్రతా కారణాల దృష్ట్యా కేంద్ర హోంశాఖ ఆ సంస్థను తర్వాత తిరస్కరించినట్టు సమాచారం. ఈసారి ఫెయిర్‌ఫాక్స్‌ ఒక్కో షేరుకు రూ. 81 చొప్పున బిడ్‌ వేసింది. అనంతరం ఇదే తమరి చివరి ఆఫర్‌ అని, అంగీకరించకపోతే బిడ్డింగ్‌ నుంచి తప్పుకుంటామని స్పష్టం చేసింది. దీంతో ప్రభుత్వం ఆ బిడ్‌ను అంగీకరించింది.