AI: ‘ఏఐ కాలం’ ఎదగాలంటే ప్రశ్నించాల్సిందే

ఇప్పటి వరకు చదువంటే పుస్తకాల్లోని విషయాలను బాగా గుర్తుపెట్టుకుని, పరీక్షల్లో రాసి, మంచి మార్కులు తెచ్చుకోవడమేనని భావించాం. కానీ, ఈ పద్ధతి ఎంతమాత్రం సరికాదనేవారు ప్రఖ్యాత తత్వవేత్త జిడ్డు కృష్ణమూర్తి. ‘నిజమైన మేధస్సు అంటే ఎక్కువ సమాచారాన్ని కలిగి ఉండటం కాదు; గమనించడం, ప్రశ్నించడం, ఆలోచించడం, స్వయంగా తెలుసుకోవడమే’ అని చెప్పేవారాయన. నేడు దానికి ఎనలేని ప్రాధాన్యం లభిస్తోంది, ముఖ్యంగా ఉద్యోగార్థులకు సొంతంగా ఆలోచించి, తెలుసుకునే సామర్థ్యం అత్యావశ్యకమవుతోంది. దీంతో అధ్యాపకులు మరింత క్రియాశీలకంగా ఎలా ఉండాలి? ఆలోచించి, విషయాలను తెలుసుకునే సామర్థ్యాన్ని విద్యార్థుల్లో ఎలా పెంపొందించాలి? అన్నవి కీలకంగా…

సమాచారాన్ని సేకరించి, అందించే పనిని ఏఐ చాలా సమర్థంగా, చిటికెలో చేసిపెడుతోంది. ఇలాంటి పరిస్థితుల్లో ఉపాధ్యాయులు కేవలం సమాచారాన్ని అందించే వ్యక్తులుగా మిగిలిపోకూడదు. విద్యార్థుల్లో ఆలోచననూ, ప్రశ్నించే తత్వాన్నీ, అన్వేషణనూ మెరుగుపరిచే మార్గదర్శిగా మారాలి. ఇందుకోసం కొన్ని ముఖ్యమైన అంశాలపై దృష్టి పెట్టాల్సి ఉంది. నేటి కాలంలో బోధన ప్రధాన లక్ష్యం విద్యార్థుల స్వీయ అభ్యాసన సామర్థ్యాన్ని పెంపొందించడమే. ఆలోచించి, పరిష్కరించగలిగే సమస్యలను అప్పగించడం ద్వారా వారిలో నేర్చుకునే స్వభావాన్నీ నైపుణ్యాన్నీ ఇనుమడింప చేయవచ్చు. నిరంతరం కొత్త విషయాలు నేర్చుకునే జిజ్ఞాస, సామర్థ్యం ఉన్నవారిని ఉద్యోగులుగా…