APNRT - Pemmasani Chandra Sekhar: అర్హులైన ప్రతి ప్రవాసాంధ్రుడికీ బీమా సదుపాయానికి కృషి: పెమ్మసాని

ఇంటర్నెట్‌ డెస్క్: అధికారిక పర్యటన నిమిత్తం దోహాకు విచ్చేసిన కేంద్రమంత్రి డా. పెమ్మసాని చంద్రశేఖర్‌ను APNRT ప్రతినిధులు, ఎన్నారై తెదేపా ఖతార్ సీనియర్ నాయకులు మర్యాదపూర్వకంగా కలసి స్వాగతం పలికారు. ఈ సందర్భంగా ప్రవాసాంధ్రుల సంక్షేమం, గల్ఫ్ దేశాల్లోని తెలుగు కుటుంబాలకు APNRT సేవలను మరింత చేరువ చేయడం వంటి అంశాలపై చర్చించారు.

విదేశాల్లో ఉపాధి పొందుతున్న ప్రవాసాంధ్రులకు అవసరమైన సమాచారం, మార్గదర్శకత్వం అందించడం, అత్యవసర పరిస్థితుల్లో సహాయం పొందేందుకు తోడ్పడటం, వారి సమస్యలను సంబంధిత అధికారుల దృష్టికి తీసుకెళ్లడం వంటి అంశాలను ప్రతినిధులు ప్రస్తావించారు. అర్హులైన ప్రతి ప్రవాసాంధ్రుడికీ బీమా సదుపాయం అందేలా కృషి చేయాల్సిన అవసరాన్నీ చర్చించారు. బీమా అర్హత, దరఖాస్తుకు అవసరమైన పత్రాలు, నమోదు విధానంపై అవగాహన కల్పించడంతో పాటు అర్హులైన వారికి దరఖాస్తు ప్రక్రియలో సహకారం అందించడం గురించి కూడా ప్రస్తావన వచ్చింది. 2029 ఎన్నికల నేపథ్యంలో పరస్పర సహకారం, సమన్వయంపై చర్చించి, కలిసికట్టుగా పని చేయాలని అంగీకరించారు.