Arrest | ఉస్మానియా యూనివర్సిటీ విద్యార్థుల ధర్నా, అరెస్ట్‌

హైదరాబాద్‌ : సమస్యలను ప్రభుత్వం దృష్టికి తీసుకెళ్లడానికి ఆందోళన నిర్వహిస్తుంటే అరెస్టులు ( Arrest ) చేయడం దారుణమని ఉస్మానియా యూనివర్సిటీ (Osmania University) విద్యార్థులు ఆగ్రహం వ్యక్తం చేశారు. శుక్రవారం వర్సిటీలో తాగునీరు, కరెంట్ సమస్యపై విద్యార్థులు ఆందోళన నిర్వహించారు. ఈ సందర్భంగా పోలీసులు అక్కడికి చేరుకుని నిరసనకు దిగిన విద్యార్థులను అరెస్ట్ చేసి నల్లకుంట పోలీస్ స్టేషన్‌కు తరలించారు.

హాస్టళ్లలో తాగునీరు, కరెంట్ కోతల వల్ల విద్యార్థులు అనేక ఇబ్బందులను ఎదుర్కొంటున్నారని ఆరోపించారు. ఎల్ నినో కారణం చూపి కాంగ్రెస్‌ ప్రభుత్వం చేతగాని తనంతో విద్యార్థిలోకంపై కూడా కోతలు విధిస్తుందని ఆరోపించారు. ప్రభుత్వం వెంటనే స్పందించి హాస్టళ్లలో తాగునీరు, కరెంట్ సరఫరా జరిగేలా చూడాలని విద్యార్థులు డిమాండ్‌ చేశారు.