అత్తపై అల్లుడి దాడి

బీర్కూర్: అత్తపై అల్లుడు దాడి చేసిన ఘటన కామారెడ్డి జిల్లా బీర్కూర్‌లో చోటుచేసుకుంది. పోలీసుల కథనం ప్రకారం.. బీర్కూర్‌కు చెందిన సతీష్ అనే వ్యక్తి అతడి భార్య సుమలతను తరుచూ వేధిస్తున్నాడు. ఈ విషయం తెలుసుకున్న సుమలత తల్లి పోశవ్వ శనివారం కుమార్తెను తీసుకెళ్లేందుకు బీర్కూర్‌కు వచ్చారు. కుటుంబ తగదా విషయాలపై అల్లుడిని నిలదీయగా మాటా మాటా పెరిగి ఇరువురి మధ్య వాగ్వాదం జరిగింది. దీంతో సతీష్ అత్త తలపై కర్రతో దాడి చేసి గాయపరిచాడు. ఆమెను చికిత్స నిమిత్తం బాన్సువాడ ఆసుపత్రికి తరలించారు. తన తల్లిపై తన భర్త సతీష్ దాడిచేశాడని బీర్కూర్ ఠాణాలో సుమలత ఫిర్యాదు చేసింది.

రోడ్డు ప్రమాదంలో ఒకరికి తీవ్ర గాయాలు నస్రుల్లాబాద్: నెమ్లి గ్రామంలోని 765డి జాతీయ రహదారిపై ఆదివారం జరిగిన రోడ్డు ప్రమాదంలో ఓ వ్యక్తికి తీవ్ర గాయాలయ్యాయి. స్థానికుల కథనం ప్రకారం.. ఓ వ్యక్తి నస్రుల్లాబాద్ నుంచి బాన్సువాడ వైపు ద్విచక్ర వాహనంపై వెళ్తున్నాడు. అదే సమయంలో నెమ్లి వద్ద బాన్సువాడకు వెళ్తున్న కంటెయినర్‌ చివరి భాగం ద్విచక్ర వాహనం తాకడంతో వాహనదారుడు జాతీయ రహదారిపై పడటంతో కుడి చెయ్యి విరగడంతో పాటు తీవ్ర గాయాలయ్యాయి. స్థానికులు గమనించి క్షతగాత్రుడిని చికిత్స నిమిత్తం బాన్సువాడ ఆసుపత్రికి తరలించారు. గాయపడిన వ్యక్తి వివరాలు తెలియాల్సి ఉంది.