Aurangzeb Tomb | ఔరంగజేబు సమాధి తొలగింపునకు డెడ్‌లైన్‌ ఫిక్స్‌.. సంచలన ప్రకటన చేసిన మహారాష్ట్ర మంత్రి!

Aurangzeb Tomb | ముంబై, అక్టోబర్‌ 30 : మొఘల్‌ చక్రవర్తి ఔరంగజేబ్‌ సమాధి తొలగింపుపై మహారాష్ట్రలో మరోసారి వివాదం రాజుకుంది. ఆ సమాధిని తొలగించేందుకు ఇప్పటికే గడువు నిర్ణయించామని, అయితే ఆ తేదీని ఇప్పుడే వెల్లడించబోమని మహారాష్ట్ర మంత్రి నితేశ్‌ రాణే ప్రకటించారు.

ఛత్రపతి శంభాజీ నగర్‌లో గురువారం జరిగిన ఓ కార్యక్రమంలో మాట్లాడిన రాణే.. ఔరంగజేబ్‌ సమాధి అంశాన్ని ప్రస్తావిస్తూ, దాని తొలగింపునకూ గడువు నిర్ణయించినట్లు చెప్పారు. సమాధి తొలగింపునకు గడువు ఖరారైందని, అయితే దాన్ని బహిరంగంగా వెల్లడించబోమని చెప్పారు. ముఖ్యమంత్రి దేవేంద్ర ఫడ్నవీస్‌కు ఈ విషయం తెలుసని, సరైన సమయంలో ఆయనే తేదీని ప్రకటిస్తారని పేర్కొన్నారు. దీంతో సమాధి తొలగింపు అంశం మహారాష్ట్రలో మరోసారి రాజకీయంగా చర్చనీయాంశమైంది.