భూపాలపల్లిలో దారుణం.. ప్రియుడితో కలిసి భర్తను హత్య చేసిన భార్య!

వివాహేతర సంబంధానికి అడ్డుగా ఉన్నాడని భావించిన ఓ మహిళ.. ప్రియుడితో కలిసి కట్టుకున్న భర్తనే హత్య చేసిన ఘటన జయశంకర్ భూపాలపల్లి జిల్లాలో కలకలం రేపింది. భూపాలపల్లి మండలం గొల్లబుద్ధారం (చిలకపల్లి) గ్రామానికి చెందిన అజ్మీరా చందు నాయక్ (39) హత్య కేసులో సంచలన విషయాలు వెలుగులోకి వచ్చాయి. ఈ హత్యకు మృతుడి భార్య పావని, ఆమె ప్రియుడు ధరావత్ సంతోష్ కారణమని పోలీసుల విచారణలో వెల్లడైనట్లు సమాచారం.

వివరాల్లోకి వెళ్తే.. గొల్లబుద్ధారం గ్రామానికి చెందిన పావనికి ధరావత్ సంతోష్‌తో కొంతకాలంగా వివాహేతర సంబంధం ఉంది. ఈ విషయం తెలుసుకున్న భర్త చందు నాయక్ తరచూ భార్యతో గొడవపడేవాడు. దీంతో తమ సంబంధానికి భర్త అడ్డుగా ఉన్నాడని భావించిన పావని.. ప్రియుడు సంతోష్‌తో కలిసి అతడిని హతమార్చాలని పథకం వేసుకున్నట్లు పోలీసుల విచారణలో తేలినట్లు తెలిసింది.