BJP: అదో అస్తవ్యస్త సభ.. ప్రధాని మోదీ ఎక్కడికీ వెళ్లరు: భాజపా

ఇంటర్నెట్‌ డెస్క్: అరాచకాన్ని సృష్టించేందుకే రాహుల్ గాంధీ (Rahul Gandhi) అనవసర సమస్యలను లేవనెత్తుతున్నారని.. ఆయన అలా చేస్తున్నంత కాలం ప్రధాని మోదీ ఎక్కడికీ వెళ్లరని భాజపా స్పష్టం చేసింది. దిల్లీలోని రామ్‌లీలా మైదానంలో ‘ఇండియా’ కూటమి నిర్వహించిన సభను అస్తవ్యస్త, అదుపుతప్పిన ప్రదర్శనగా పేర్కొంది. ఈ సభకు 10 లక్షల మంది వస్తారని కాంగ్రెస్ చెప్పినప్పటికీ.. కొద్ది మందే మాత్రమే హాజరయ్యారని భాజపా (BJP) అధికార ప్రతినిధి సంబిత్‌ పాత్ర తెలిపారు. పది లక్షల మంది జనం.. ఓటు చోరీ ఆరోపణలు.. రెండూ అబద్ధాలేనని విమర్శించారు.

ఫొటోగ్రఫీ ట్రిక్కులతో సభలో భారీ జనసందోహాన్ని చూపించారని.. అయితే, ట్రిక్కులతో ఎవరూ ప్రధాని కాలేరని రాహుల్‌ గాంధీని ఉద్దేశించి సంబిత్‌ పాత్ర ఎద్దేవా చేశారు. 2024 లోక్‌సభ ఎన్నికలను చట్టవిరుద్ధమని రాహుల్‌ పేర్కొనడాన్ని ఖండించారు. ‘‘2024 ఎన్నికలు చట్టవిరుద్ధమని, అలా జరగకపోయి ఉంటే నరేంద్ర మోదీ ప్రధాని, అమిత్ షా కేంద్ర హోంశాఖ మంత్రి అయ్యేవారు కాదంటూ రాహుల్ గాంధీ అన్నారు. మొగల్ చక్రవర్తి పిల్లలు మాట్లాడినట్లుగా ఆయన భాష ఉంది. హిందుస్థాన్ మీ తండ్రి జాగీరు కాదు. ఇది భారతీయులందరిదీ’’ అని సంబిత్ పాత్ర ధ్వజమెత్తారు.