Brothers Lifestyle Upgrade | సోదరుల జీవనశైలిలో ఆకస్మిక మార్పు.. ఇంట్లో దాచిన డ్రమ్ముల్లో కోట్లలో డబ్బు చూసి పోలీసులు షాక్‌

లక్నో: అన్నాదమ్ముల జీవనశైలిలో ఆకస్మిక మార్పు చూసి గ్రామస్తులు నోరెళ్లబెట్టారు. వారిద్దరూ ఎకరాల కొద్దీ భూములు, ట్రాక్టర్‌ కొనుగోలు చేయడం, విలాసవంతంగా డబ్బు ఖర్చు చేయడంపై ఆశ్చర్యపోయారు. బ్లాక్‌ మనీపై సమాచారం అందుకున్న పోలీసులు ఆ సోదరుల ఇంట్లో తనిఖీ చేశారు. భూమిలో పాతిన మూడు డ్రమ్ముల్లో కోట్ల డబ్బు ఉండటం చూసి షాక్‌ అయ్యారు. (Brothers Lifestyle Upgrade) ఉత్తరప్రదేశ్‌లోని ప్రయాగ్‌రాజ్ జిల్లాలో ఈ సంఘటన జరిగింది. రామ్‌నగర్ గ్రామంలోని బరైపూర్‌కు చెందిన సోదరులైన రాకేష్‌ యాదవ్, రాజేష్‌ యాదవ్‌ గతంలో పూణేలో పనిచేశారు. 2020లో కరోనా మహమ్మారి సమయంలో వారిద్దరూ తమ ఉద్యోగాలు వదిలేసి గ్రామానికి తిరిగి వచ్చారు.

కాగా, సాధారణ కుటుంబానికి చెందిన రాకేష్‌, రాజేష్‌ల ఆర్థిక పరిస్థితి, జీవనశైలిలో ఆ తర్వాత నుంచి భారీ మార్పులు రావడాన్ని స్థానికులు గమనించారు. చాలా తక్కువ కాలంలోనే ఆ గ్రామంతో పాటు చుట్టుపక్కల ప్రాంతాల్లో ఎకరాల కొద్దీ భూములను వారు కొనుగోలు చేశారు. ఒక ట్రాక్టర్‌ను సమకూర్చుకున్నారు. విలాసవంతంగా డబ్బు ఖర్చు చేయడం మొదలుపెట్టారు. సాధారణ ఉద్యోగాలు చేసే అన్నాదమ్ములు ఇంత ధనవంతులుగా ఎలా మారారో తెలియక గ్రామస్తులు ఆశ్చర్యపోయారు.