ఛాయా సోమేశ్వరాలయ అభివృద్ధికి రూ. 20 కోట్లు.. యునెస్కో గుర్తింపే లక్ష్యం

హైదరాబాద్: నల్గొండ జిల్లా పానగల్‌లోని చారిత్రక ఛాయా సోమేశ్వరాలయ అభివృద్ధికి రాష్ట్ర ప్రభుత్వం రూ.20 కోట్లు మంజూరు చేయడంపై రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి హర్షం వ్యక్తం చేశారు. ఆలయాన్ని అన్ని విధాలా అభివృద్ధి చేసి ప్రపంచస్థాయి పర్యాటక కేంద్రంగా తీర్చిదిద్దుతామని తెలిపారు. అంతేకాకుండా, ఈ చారిత్రక ఆలయానికి యునెస్కో గుర్తింపు తీసుకురావడానికి కృషి చేస్తానని వెల్లడించారు.

తెలంగాణ చారిత్రక, సాంస్కృతిక వైభవానికి ఛాయా సోమేశ్వరాలయం ప్రతీకగా నిలుస్తోందని మంత్రి కోమటిరెడ్డి వెంకట్ రెడ్డి తెలిపారు.. వందల ఏళ్ల క్రితమే శిల్పులు కాంతి, నీడ, నిర్మాణ శాస్త్రాలను సమన్వయం చేసి శివలింగంపై నిరంతరం ఛాయ కనిపించేలా ఆలయాన్ని నిర్మించడం విశేషమని అన్నారు. ప్రాచీన భారతీయ నిర్మాణ విజ్ఞానానికి, తెలంగాణ శిల్పకళా నైపుణ్యానికి ఈ ఆలయం అద్భుత ఉదాహరణగా నిలుస్తోందని వివరించారు.