Cyclone Arnab | అర్న‌బ్ తుపాను ఎఫెక్ట్‌.. ఏపీలో బీచ్‌ల‌ను మూసేసిన అధికారులు..!

Cyclone Arnab : తీరానికి చేరువైన అర్నబ్‌ తుపాను (Cyclone Arnab) ప్రభావంతో ఆంధ్ర‌ప్ర‌దేశ్‌లోని పలు బీచ్‌లను అధికారులు మూసివేశారు. విశాఖప‌ట్నం సహా పలు తీరప్రాంతాల్లో అలలు ఉవ్వెత్తున‌ ఎగసిపడుతున్నాయి. మ‌రోవైపు సముద్రం ముందుకు వస్తుండటంతో పర్యాటకుల ప్రవేశంపై అధికారులు ఆంక్షలు విధించారు. విశాఖలోని రుషికొండ, ఆర్కేబీచ్‌లతోపాటు బాపట్ల జిల్లాలో చీరాల, ఓడరేవు, రామాపురం, పొట్టిసుబ్బయ్యపాలెం బీచ్‌లను తాత్కాలికంగా మూసివేశారు.

హైదరాబాద్‌ సహా ఇతర ప్రాంతాల నుంచి పర్యాటకులు విశాఖ సంద‌ర్శ‌న‌కు రావద్దని అధికారులు సూచించారు. అధికారిక ఉత్తర్వులు వెలువడే వరకు బీచ్‌లలో ఆంక్షలు కొనసాగుతాయని వెల్ల‌డించారు. తుపాను ప్రభావం కార‌ణంగా అధికారుల హెచ్చ‌రిక‌ల నేప‌థ్యంలో మత్స్యకారులు చేప‌ల‌వేట‌ను నిలిపివేశారు. బోట్లను ఒడ్డుకు చేర్చారు. బాపట్ల జిల్లా నిజాంపట్నం హార్బర్‌ జెట్టీ, కొత్తపాలెం, నక్షత్రనగర్‌, లంకెవానిదిబ్బ, పెనుమూడిలో బోట్లను ఒడ్డుకు తీసుకొచ్చారు.