dhanvanthari: ఆరోగ్యదేవతకు అర్చన

ఆరోగ్యమే మహాభాగ్యం- అన్నారు పెద్దలు. సంపదలు, సౌఖ్యాలు ఎన్ని ఉన్నా ఆరోగ్యం లేకపోతే జీవితంలో ఆనందం ఉండదు. అలాంటి ఆరోగ్యానికి అధిదేవతగా పూజలందుకుంటున్న ధన్వంతరి స్వామి ఆవిర్భావం గురించిన పురాణకథ ఉంది.

అమృతం కోసం దేవతలు, రాక్షసులు క్షీరసాగర మథనం చేయడానికి పూనుకున్నారు. మందర పర్వతాన్ని కవ్వంగా, వాసుకి అనే సర్పాన్ని తాడుగా చేసుకొని పాలసముద్రాన్ని మథించగా.. మొదట హాలాహలం వెలువడింది. లోకాలను రక్షించడానికి పరమశివుడు ఆ గరళాన్ని తన కంఠంలో నిలిపాడు. అనంతరం కామధేనువు, కల్పవృక్షం, ఐరావతం, లక్ష్మీదేవి వంటి అనేక దివ్య సంపదలు ఆవిర్భవించాయి. చివరికి చేతిలో అమృతకలశంతో ధన్వంతరి స్వామి సముద్రగర్భం నుంచి ఉద్భవించాడు.