Dharmaram | ధర్మారంలో ఫుడ్ సేఫ్టీ అధికారి చే తనిఖీలు.. ఓ కిరాణం, రెస్టారెంట్‌లో ఆహార పదార్థాల నమూనా సేకరణ

Dharmaram | ధర్మారం, అక్టోబర్ 29 : పెద్దపల్లి జిల్లా ధర్మారం మండల కేంద్రంలో జిల్లా ఫుడ్ సేఫ్టీ అధికారి తుమ్మల అరవింద్ రెడ్డి గురువారం కిరాణం, రెస్టారెంట్ హోటల్లో ఆకస్మిక తనిఖీలు చేశారు. ఆహార పదార్థాల్లో కల్తీ జరుగుతుందని వచ్చిన సమాచారం మేరకు ఆయన తనిఖీలు చేపట్టారు. ధర్మారం మండల కేంద్రంలోని ఓ కిరాణా దుకాణంలో పలు ఆహార ధాన్యాలు, నూనెలు పరిశీలించారు. అనుమానం ఉండడంతో వాటి నమూనాలు సేకరించారు. అనంతరం ఓ రెస్టారెంట్ హోటల్ లో వండిన ఆహార పదార్థాలను, వాడుతున్న నూనెలను తనిఖీ చేసి వాటి శాంపిళ్లను సేకరించారు.

కిరాణం, హోటల్లో సేకరించిన ఆహార పదార్థాలను పరీక్ష చేసి కల్తీ నిర్ధారణ కోసం హైదరాబాద్ ఫుడ్ సేఫ్టీ ల్యాబ్ కు పంపించినట్లు జిల్లా ఫుడ్ సేఫ్టీ అధికారి అరవింద్ రెడ్డి తెలిపారు. ఆహార పదార్థాలు కల్తీ తేలితే సంబంధిత కిరాణా వ్యాపారి, హోటల్ నిర్వాకుడిపై చర్యలు ఉంటాయని ఆయన తెలిపారు. ఫుడ్ సేఫ్టీ స్టాండర్డ్స్ అథారిటీ ఆఫ్ ఇండియా (ఎఫ్ఎఫ్ఏఏఐ) లైసెన్సు లేకపోవడంతో కిరాణా దుకాణ యజమాని, హోటల్ నిర్వాకుడికి నోటీస్ జారీ చేసినట్లు ఆయన తెలిపారు.