ఏకపక్ష నిర్ణయాలేమి లేవు.. డెసిషన్స్ అన్నీ ముగ్గురు తీసుకున్నవే: ఈసీ

న్యూఢిల్లీ: ఓటర్ల జాబితా ప్రత్యేక సమగ్ర సవరణ (సర్) ప్రక్రియలో ప్రధాన ఎన్నికల కమిషనర్ జ్ఞానేష్ కుమార్ ఏకపక్ష నిర్ణయాలు తీసుకున్నారన్న ఆరోపణలను భారత ఎన్నికల సంఘం (ఈసీఐ) ఖండించింది. సర్‎కు సంబంధించి జారీ చేసిన మూడు ఉత్తర్వులను ముగ్గురు సభ్యుల ఎన్నికల సంఘం ఏకగ్రీవంగా తీసుకుందని సుప్రీంకోర్టులో దాఖలు చేసిన అఫిడవిట్‎లో ఈసీ పేర్కొంది. సీఈసీ ఏకపక్ష నిర్ణయాలు తీసుకుంటున్నారన్న ఆరోపణలు కేవలం ఒకే ఒక్క మీడియా నివేదిక ఆధారంగా వచ్చాయని.. ఇందులో ఎలాంటి నిజం లేదని ఈసీ స్పష్టం చేసింది. ఇక, ఓటరు నమోదుకు ఉద్దేశించిన ఫామ్ 6లోనూ ఎలాంటి మార్పులు చేయలేదని తెలిపింది.

ఓటర్ల జాబితా ప్రత్యేక సమగ్ర సవరణ ప్రక్రియలో అవకతవకలు జరిగాయని.. ఎన్నికల సంఘంలోని మరో ఇద్దరు కమిషనర్ల అభిప్రాయాలను పరిగణలోకి తీసుకోకుండా సీఈసీ జ్ఞానేష్ కుమార్ ఏకపక్ష నిర్ణయాలు తీసుకున్నారని ఆరోపిస్తూ ప్రతిపక్ష పార్టీలు సుప్రీం కోర్టులో పిటిషన్లు దాఖలు చేశాయి. ఈ పిటిషన్లపై విచారణ చేపట్టిన సుప్రీంకోర్టు.. కౌంటర్ దాఖలు చేయాలని కేంద్ర ప్రభుత్వానికి, ఎన్నికల సంఘానికి నోటీసులు జారీ చేసింది. సుప్రీంకోర్టు ఆదేశాల మేరకు తాజాగా ఈసీ అఫిడవిట్ దాఖలు చేసింది. ఇందులో ఈసీ కీలక విషయాలు పేర్కొంది.