Emergency Fund: అత్యవసర నిధి ఎందులో ఉంచాలి?

జీవితం అనూహ్యమైంది. వైద్య అత్యవసర పరిస్థితి, ఆకస్మిక ఉద్యోగ నష్టం, తక్షణ ఇంటి మరమ్మతులు, కుటుంబ అత్యవసర పరిస్థితులు లేదా అనుకోని దూర ప్రయాణాలు వంటి అత్యవసర పరిస్థితులు ఎటువంటి హెచ్చరికలు లేకుండా ఎప్పుడైనా రావచ్చు. ఇవి మీ ఆర్థిక ప్రణాళికను దెబ్బతీస్తాయి. ఇటువంటప్పుడే 'అత్యవసర నిధి' మీ ఆర్థిక అవసరాలకు ఎంతగానో ఉపయోగపడుతుంది. అత్యవసర నిధి అంటే, చెడు పరిస్థితులకు సిద్ధంగా ఉండడం. అది లేకపోతే సంక్షోభ సమయంలో మీ పెట్టుబడుల వ్యూహాలు దెబ్బతినొచ్చు. మీ అత్యవసర నిధి ప్రణాళిక..మీ వయసు, జీవనశైలి, బాధ్యతలు, వృత్తి స్థిరత్వాన్ని ప్రతిబింబించాలి.

ఇది..మీ ఆదాయ స్థిరత్వం, మీపై ఆధారపడిన వారి సంఖ్య, మీ జీవనశైలిపై ఆధారపడి ఉంటుంది. ఉదాహరణకు, టైర్-1 నగరంలో నివసించే ఒక కుటుంబానికి నిత్యావసరాలు, ఇతర ముఖ్యమైన ఖర్చులు సుమారు రూ. 80,000 అవుతాయని అనుకుంటే..రూ.2.40 లక్షల నుంచి రూ.4.80 లక్షల అత్యవసర నిధి ఉండడం మేలు. ఇంకా, మీపై పూర్తిగా ఆధారపడిన తల్లిదండ్రులుంటే, వారి వయసు రీత్యా వైద్య ఖర్చులు ఎక్కువ ఉంటాయి కాబట్టి, మరింత నిధి అవసరం. దీనికి తగ్గట్టుగా మీరు ప్లాన్‌ చేసుకోవాలి.