Fireworks: బాణసంచా మోత.. మూగజీవాల బాధ

ఆకాశంలో వెలుగుల జిలుగులు.. వీధుల్లో టపాసుల మోతలు.. ఇంటింటా సంబరాలకు ప్రతీక దీపావళి పండుగ. మితిమీరిన బాణసంచా మోతలు, శబ్దాలు, పొగ మనుషులకే కాదు.. మూగజీవాలకు తీవ్ర ఇబ్బందే. జంతువులు, పక్షులు బాణసంచా శబ్దాలకు బెదిరిపోవడం.. నిప్పురవ్వలతో గాయాలవడం.. పొగ వాటి ఆరోగ్యంపై తీవ్ర ప్రభావం చూపుతుంది. అందుకే, పండుగ వేళ మూగజీవాలను దృష్టిలో పెట్టుకుని టపాసులు కాల్చాలని.. వాటికి ఎలాంటి ప్రమాదం తలెత్తకుండా తగిన జాగ్రత్తలు తీసుకోవాలని పర్యావరణవేత్తలు, జంతు ప్రేమికులు చెబుతున్నారు.

కుక్కలు, పిల్లులు, ఇతర పెంపుడు జంతువులకు వినికిడి సామర్థ్యం ఎక్కువ. భారీగా శబ్దం వచ్చే బాణసంచాతో ఇవి తీవ్ర భయాందోళనకు గురవుతాయి. శబ్దాలకు బెదిరిపోవడం, ఆహారం తీసుకోకపోవడం చేస్తుంటాయి. భయంతో పరుగులు పెడుతూ.. హఠాత్తుగా రోడ్లపైకి వెళ్తూ ప్రమాదాల బారిన పడుతుంటాయి.