Gold imports: 1500% పెరిగిన బంగారం అక్రమ రవాణా

ఇంటర్నెట్ డెస్క్: భారత్‌లో అక్రమంగా బంగారం దిగుమతులు (Gold imports) గణనీయంగా పెరుగుతున్నాయి. దాదాపు 1500 శాతం స్మగ్లింగ్‌ పెరిగినట్లు ప్రపంచ స్వర్ణ మండలి (WGC) గణాంకాలు పేర్కొంటున్నాయి. జులై- సెప్టెంబర్‌ త్రైమాసికంలో 50 మెట్రిక్‌ టన్నుల గోల్డ్‌ స్మగ్లింగ్‌ జరిగిందని డబ్ల్యూజీసీ గణాంకాలను ఉటంకిస్తూ బ్లూమ్‌బెర్గ్‌ ఓ కథనం రాసింది. గతేడాది ఇదే కాలంలో అక్రమ మార్గంలో 3 టన్నుల బంగారం దిగుమతి అయ్యిందని తెలిపింది. 2023 తర్వాత ఈ స్థాయిలో అక్రమ రవాణా జరగడం ఇదే తొలిసారి అని పేర్కొంది.

ప్రపంచవ్యాప్తంగా బంగారం వినియోగంలో భారత్‌ రెండో స్థానంలో ఉంది. పశ్చిమాసియా ఉద్రికత్తల వల్ల డాలరుతో పోలిస్తే రూపాయి విలువ బలహీనపడింది. ఈ క్రమంలో ఖరీదైన లోహాల కొనుగోళ్లను అరికట్టడానికి, ఫారెక్స్‌ నిల్వలను కాపాడుకోవడానికి కేంద్రం బంగారం, వెండి దిగుమతి సుంకాన్ని పెంచింది. ఈ ఏడాది మే నెలలో 6 శాతంగా ఉన్న దిగుమతి సుంకాన్ని దాదాపు 15 శాతానికి పెంచింది. సుంకాల కారణంగా బంగారం భారంగా మారడంతో పన్నులను తప్పించుకునేందుకు స్మగ్లర్లు అక్రమ రవాణాలను ఎంచుకున్నారు. కస్టమ్స్‌ అధికారుల కళ్లుగప్పి అక్రమ మార్గంలో దేశంలోకి బంగారాన్ని తరలిస్తున్నారు.