గ్రామాభివృద్దే నా లక్ష్యం: ఎమ్మెల్యే విజయ్‌చంద్ర

బలిజిపేట: గ్రామాభివృద్ధే తన లక్ష్యం అని ఎమ్మెల్యే విజయ్‌చంద్ర అన్నారు. పార్వతీపురం నియోజకవర్గంలోని అన్ని గ్రామాల్లో తెదేపా, జనసేన పార్టీ జెండాలు ఎగరవేసేందుకు ప్రజలందరూ.. తెదేపా ఎంపీటీసీ అభ్యర్థి బంకపల్లి సింహాచలం, జడ్పీటీసీ జనసేన అభ్యర్థిని పాలూరు చాందినికి ఓటు వేసి అత్యధిక మెజార్టీతో గెలిపించాలని ఆయన కోరారు. కూటమి అభ్యర్థులను గెలిపిస్తే మండలంలోని అన్ని గ్రామాల్లో మరింత అభివృద్ధి జరుగుతుందని ఎమ్మెల్యే బోనెల విజయ్ చంద్ర అన్నారు. మండలంలోని బడేవలస, సుభద్ర, చిలకలపల్లి, గలావల్లి, బలిజిపేట, నారాయణపురం గ్రామాల్లో ఆయన కూటమి అభ్యర్థులతో కలిసి భారీ ర్యాలీ నిర్వహించారు.

ఈ సందర్భంగా ఆయా గ్రామాల్లో ఏర్పాటు చేసిన సభలో ఆయన మాట్లాడారు. ప్రతి గ్రామంలో సాగు, తాగునీరు, రహదారుల నిర్మాణానికి తన వంతు నిధులు మంజూరు చేసామన్నారు. గ్రామానికి వస్తున్న గొడ్డలి పార్టీ నాయకుల మాటలను ప్రజలు నమ్మవద్దని, అభివృద్ధి చేసేందుకు ముందుకు వస్తున్న కూటమి నేతలకు అండగా నిలవాలని ఆయన ఓటర్లను కోరారు. కార్యక్రమంలో ఉపాధ్యక్షుడు బి.రామ్మోహన్ రావు, తెదేపా నాయకులు రాంబాబు, సింహాచలం నాయుడు, కర్రి శ్రీరామ్, గౌరునాయుడు, తెదేపా అభ్యర్థులు తదితరులు పాల్గొన్నారు.