IDBI Bank: నవంబర్‌ 2 నుంచి ఐడీబీఐ ఉద్యోగుల దేశవ్యాప్త సమ్మె

ఇంటర్నెట్‌ డెస్క్: ఐడీబీఐ బ్యాంక్‌ ఉద్యోగులు దేశవ్యాప్తంగా రెండు రోజుల పాటు సమ్మె నిర్వహించనున్నారు (IDBI Bank employees strike). బ్యాంకు ప్రైవేటీకరణ ప్రక్రియను నిలిపివేయాలన్న డిమాండ్‌తో నవంబర్‌ 2,3 తేదీల్లో సమ్మెకు ఐడీబీఐ అధికారులు, ఉద్యోగుల ఐక్య వేదిక పిలుపునిచ్చింది. విదేశీ సంస్థకు బ్యాంకు నియంత్రణ బదిలీ చేస్తే.. ప్రజా పెట్టుబడులపై, ఉద్యోగులపై ప్రభావం పడుతుందని ఐక్య వేదిక ఆందోళన వ్యక్తం చేసింది. ఈ నిర్ణయం జాతీయ ప్రయోజనాలను దెబ్బతీస్తుందని పేర్కొంది. కేంద్రం, బ్యాంకు యాజమాన్యం ప్రైవేటీకరణ ప్రతిపాదనను రద్దు చేసుకోవాలని డిమాండ్‌ చేసింది.

అయితే, ఐడీబీఐ బ్యాంకులోని 60.72 శాతం వాటాను కెనడాకు చెందిన ఫెయిర్‌ఫాక్స్ ఫైనాన్షియల్ హోల్డింగ్స్‌కు విక్రయించడానికి కేంద్రం ఇటీవల ఆమోదం తెలిపింది. దీనిపై ఇప్పటికే రాజకీయ దుమారం చెలరేగింది. ఈ అంశంపై కేంద్ర ఆర్థిక మంత్రి నిర్మలా సీతారామన్‌, లోక్‌సభ ప్రతిపక్షనేత రాహుల్‌ గాంధీ మధ్య మాటల యుద్ధం జరిగిన సంగతి తెలిసిందే.