ఇది కాంగ్రెస్ తెచ్చిన కరువు..కుప్పంలో కృష్ణా నీళ్లు పారుతుంటే.. వనపర్తికి ఎందుకు రావు

హైదరాబాద్/ పెద్దమందడి, వెలుగు: రాష్ట్రంలో కరువు కాలం తెచ్చింది కాదని, కాంగ్రెస్ అసమర్థత వల్ల సీఎం రేవంత్ రెడ్డి తీసుకొచ్చిన కరువేనని మాజీ మంత్రి, బీఆర్ఎస్ఎల్పీ డిప్యూటీ ఫ్లోర్ లీడర్ తన్నీరు హరీశ్ పేర్కొన్నారు. వనపర్తి జిల్లా పెద్దమందడి మండలం అల్వాలలో సాగునీరు అందక ఎండిపోయిన పంట పొలాలను సోమవారం మాజీ మంత్రులు నిరంజన్ రెడ్డి, శ్రీనివాస్ గౌడ్, లక్ష్మారెడ్డి తదితర నేతలతో కలిసి ఆయన పరిశీలించారు. అనంతరం నిర్వహించిన రైతు బహిరంగ సభలో హరీశ్ రావు మాట్లాడారు.

అల్వాల గ్రామంలోనే 250 ఎకరాలు, రాష్ట్రవ్యాప్తంగా దాదాపు 25 లక్షల ఎకరాల్లో పంటలు ఎండిపోయాయన్నారు. శ్రీశైలానికి 221 టీఎంసీలు, జూరాలకు 252 టీఎంసీల నీళ్లు వచ్చినా సకాలంలో మోటార్లు ఆన్ చేయకుండా పంటలను ఎండబెట్టారని ఫైర్​ అయ్యారు.