ఇక ఆధార్ కార్డ్ వేస్టా..? ఓటరు కార్డుతోనే ప్రభుత్వ పథకాలు ఇస్తారా..?

కేంద్ర ప్రభుత్వ పథకాల లబ్ధిదారులకు చెల్లింపుల విధానంలో భారీ మార్పులు రానున్నాయి. ప్రస్తుతం దేశవ్యాప్తంగా ప్రభుత్వ సంక్షేమ పథకాల నిధులు నేరుగా లబ్ధిదారుల అకౌంట్లలోకి జమ చేసేందుకు ఇప్పటి వరకూ 'ఆధార్' కేంద్రంగా ఉంది. అయితే త్వరలోనే ఆధార్ స్థానంలో బయోమెట్రిక్, ఓటర్ ఐడీ నంబర్లను ప్రాతిపదికగా తీసుకుని చెల్లింపులు జరపనున్నట్లు కేంద్రమంత్రి రాజీవ్ రంజన్ సింగ్ (లలన్ సింగ్) ప్రకటించి అందరినీ షాక్‌కి గురిచేశారు.

కేంద్ర పంచాయతీరాజ్, మత్స్య, పశుసంవర్ధక, డెయిరీ శాఖల మంత్రిగా బాధ్యతలు నిర్వర్తిస్తున్న లలన్ సింగ్.. ఢిల్లీలో జరిగిన 'పీపుల్స్ ప్లాన్ క్యాంపెయిన్ 2026-27' జాతీయ వర్క్‌షాప్‌లో ఈ కామెంట్స్ చేశారు. దేశంలోని ప్రతి గల్లీలోనూ ఆధార్ కేంద్రాలు సులభంగా అందుబాటులో ఉంటున్నాయని.. కేవలం 5 నిమిషాల్లోనే కొత్త ఆధార్ కార్డులు తయారవుతున్న వేళ.. భవిష్యత్తులో లబ్ధిదారుల గుర్తింపుకు, చెల్లింపులకు ఆధార్ కార్డ్ ప్రాతిపదిక కాబోదని ఆయన స్పష్టం చేశారు. ఆధార్ స్థానంలో లబ్ధిదారుల బయోమెట్రిక్, ఓటర్ ఐడీ కార్డులోని EPIC నంబర్‌ ఆధారంగానే నగదు బదిలీ చేపట్టనున్నట్లు చెప్పారు.