జమ్ము కశ్మీర్‌ సీఎంపై 24 మంది ఎమ్మెల్యేల అసంతృప్తి

శ్రీనగర్‌: జమ్ము కశ్మీర్‌ సీఎం ఒమర్‌ అబ్దుల్లా ఇటీవల చేపట్టిన క్యాబినెట్‌ విస్తరణపై పాలక పక్షం నేషనల్‌ కాన్ఫరెన్స్‌కు చెందిన 24 మంది ఎమ్మెల్యేల్లో అసంతృప్తి వ్యక్తమైంది. వీరిలో 18 మంది ఎమ్మెల్యేలు శుక్రవారం లోలబ్‌ ఎమ్మెల్యే ఖైసర్‌ జంషీద్‌ ఇంట్లో సమావేశం కాగా ఆరుగురు ఎమ్మెల్యేలు వీడియో కాన్ఫరెన్స్‌ ద్వారా పాల్గొన్నారు. సీఎం సలహాదారు నసిర్‌ సోగామి, నలుగురు కొత్త మంత్రులను తొలగించాలని వారు డిమాండ్‌ చేశారు.

క్యాబినెట్‌లోనూ భారీ మార్పులు చేపట్టాలని కోరారు. సోగామి పార్టీ విధుల్లో జోక్యం చేసుకొంటూ నాయకత్వాన్ని తప్పు దోవ పట్టిస్తున్నారని వారు ఆరోపించారు. తమ డిమాండ్లపై పార్టీ అధ్యక్షుడు ఫరూక్‌ అబ్దుల్లాను, సీఎం ఒమర్‌ అబ్దుల్లాను కలవాలని వారు నిర్ణయించుకొన్నారు. తాము పార్టీని వీడబోమని ప్రతిజ్ఞ చేశారు. కొందరు పార్టీ అంతర్గత పనితీరును బలహీనపరుస్తున్నారని అసంతృప్త ఎమ్మెల్యేలు విమర్శించారు.