కరువు నివారణ చర్యలు తక్షణమే చేపట్టాలి డిప్యూటీ సీఎంకు సీపీఎం ప్రతినిధుల విజ్ఞప్తి

హైదరాబాద్‌, అక్టోబర్‌ 28 (నమస్తే తెలంగాణ): రాష్ట్రంలో కరువు నివారణ ప్రణాళికను యుద్ధప్రాతిపదికన అమలు చేయాలని సీపీఎం డిమాండ్‌ చేసింది. ఈ మేరకు బుధవారం సచివాలయంలో జరిగిన అఖిలపక్ష సమావేశంలో సీపీఎం తరఫున సీపీఎం రాష్ట్ర కార్యదర్శి జాన్‌వెస్లీ, మాజీ ఎమ్మెల్యే సీనియర్‌ నాయకుడు నంద్యాల నర్సింహారెడ్డి హాజరయ్యారు. ఈ సందర్భంగా వారు మాట్లాడుతూ.. ప్రభుత్వం ప్రకటించిన 365 కరువు మండలాల్లో నష్టపోయిన వాణిజ్య పంటలకు రూ.50వేలు, ఇతర పంటలకు రూ.30వేల చొప్పున రైతు ఖాతాల్లో జమ చేయాలని కోరారు.

రూ.2లక్షలలోపు అన్ని రకాల పంట రుణాలను తక్షణమే మాఫీ చేయాలని విన్నవించారు. ఆహార భద్రత, ఉచిత రేషన్‌ కిట్‌ ధరల నియంత్రణ పాటించాలని సూచించారు. బియ్యం, నిత్యావసరాల అక్రమ నిల్వలు చేయకుండా చర్యలు తీసుకోవాలని కోరారు. గ్రామ పంచాయతీల పరిధిలో పేదలు, వృద్ధుల కోసం ఉచిత రాగి జావ, మజ్జిగ పంచే “భోజన కేంద్రాలు ప్రారంభించాలని సూచించారు.