ఖమ్మం జిల్లాపై ‘అర్నబ్‌’ తుపాను ప్రభావం.. జిల్లా వ్యాప్తంగా మోస్తరు వర్షం

ఖమ్మం రూరల్‌: బంగాళాఖాతంలో ఏర్పడిన అల్పపీడనం తుపానుగా మారడంతో దాని ప్రభావం ఆంధ్రప్రదేశ్‌ సరిహద్దులో ఉన్న ఖమ్మం జిల్లాపైనా కనిపిస్తున్నది. బుధవారం ఉదయం నుంచి సాయంత్రం వరకు జిల్లావ్యాప్తంగా బలమైన ఈదురుగాలులు వీచగా.. గురువారం తెల్లవారుజాము నుంచి తేలికపాటి జల్లులు ప్రారంభమయ్యాయి. ఉదయం 9 గంటల తర్వాత ఖమ్మం నగరంతోపాటు జిల్లాలోని పలు మండలాల్లో ఓ మోస్తరు వర్షం కురిసింది.

వర్షం కారణంగా ప్రభుత్వ, ప్రైవేటు కార్యాలయాలకు వెళ్లే ఉద్యోగులు, పాఠశాలలు, కళాశాలలకు వెళ్లే విద్యార్థులు స్వల్ప ఇబ్బందులు ఎదుర్కొన్నారు. మరోవైపు చాలా రోజుల తర్వాత వర్షం కురుస్తుండటంతో జిల్లా ప్రజలు సంతోషం వ్యక్తం చేస్తున్నారు. అయితే పంటలు చేతికొచ్చే సమయంలో వర్షాలు కురుస్తుండటంతో రైతుల్లో ఆందోళన నెలకొంది.