‘మంగన్‌లో పెట్టి తిప్పితే అన్నీ సెట్‌’

సిద్దిపేట, అక్టోబర్‌ 29 (నమస్తే తెలంగాణ ప్రతినిధి) : ప్రజా సమస్యలను పరిషరించాల్సిన బాధ్యతాయుతమైన ప్రభుత్వ అధికారి నుంచి వచ్చిన అనుచిత వ్యాఖ్యలు సిద్దిపేట జిల్లాలో తీవ్ర చర్చనీయాంశంగా మారాయి. బండచర్లపల్లిలోని 767 సర్వే నంబర్‌లో 11.5 ఎకరాల ప్రభుత్వ భూమి ఉంది. ఈ భూమికి సంబంధించి సర్వే నిర్వహిస్తున్న నేపథ్యంలో వివరాలు తెలుసుకునేందుకు తహసీల్దార్‌ గ్రామానికి వచ్చారు. ఈ సందర్భంగా గ్రామపంచాయతీ భవనంలో గ్రామస్తులతో మాట్లాడుతూ.. ప్రభుత్వ భూమిలో అనుమతులు లేకుండా నిర్మించిన కట్టడాలను తొలగిస్తామని వెల్లడించారు.

ఈ క్రమంలో గ్రామానికి చెందిన రంజిత్‌కుమార్‌ తన ఇంటి నిర్మాణానికి అనుమతులు ఇవ్వాలని తహసీల్దార్‌ను కోరాడు. దీనికి అనుమతులు లేవని తహసీల్దార్‌ చెప్పడంతో.. తాము సుడా నుంచి అనుమతి తీసుకున్నామని రంజిత్‌ వివరించాడు. ఈ క్రమంలో మంగన్‌లో పెట్టి తిప్పితే అన్నీ సెట్‌ అవుతాయి.. సుడా గిడా సెట్‌ అవుతాయి అంటూ తహసీల్దార్‌ వ్యాఖ్యానించారు. తహసీల్దార్‌ వ్యాఖ్యలతో మనస్తాపానికి గురైన రంజిత్‌కుమార్‌.. ఈ ఘటనకు సంబంధించిన వీడియోను వాట్సాప్‌ ద్వారా సిద్దిపేట కలెక్టర్‌కు పంపించి ఫిర్యాదు చేశాడు.