Maria Corina Machado: నాడు రహస్యంగా దేశాన్ని వీడి.. నేడు తిరిగొచ్చిన నోబెల్‌ శాంతి పురస్కార గ్రహీత

ఇంటర్నెట్‌ డెస్క్: వెనెజువెలా విపక్ష నేత, నోబెల్‌ శాంతి పురస్కార గ్రహీత మరియా కొరీనా మచాడో (Maria Corina Machado) తిరిగి స్వదేశానికి చేరుకున్నారు. గతేడాది డిసెంబరులో అప్పటి దేశాధ్యక్షుడు నికోలస్‌ మదురో పాలన సమయంలో ఆమె రహస్యంగా దేశాన్ని వీడిన విషయం తెలిసిందే. 10 నెలలకుపైగా ప్రవాస జీవనం గడిపిన అనంతరం తాజాగా వెనెజువెలాకు తిరిగి వచ్చారు. తన రాకను సామాజిక మాధ్యమాల్లో తెలియజేస్తూ.. ‘‘నేను ఇక్కడే ఉన్నాను. మీతో ఉన్నాను’’ అని పేర్కొన్నారు. వెనెజువెలా ప్రతిపక్ష నేత ఎడ్ముండో గొంజాలెజ్ ఆమె వచ్చిన విషయాన్ని ధ్రువీకరించారు.

మదురో పాలనలో మరియా ఎన్నో ఆంక్షలు ఎదుర్కొన్నారు. నిషేధం విధించిన నేపథ్యంలో బయటకు వస్తే అధికారులు అరెస్టు చేస్తారనే భయంతో అజ్ఞాతంలో గడిపారు. ఈ క్రమంలోనే దేశంలో ప్రజాస్వామ్యం, శాంతి స్థాపన కోసం చేసిన కృషికి గుర్తింపుగా నోబెల్‌ శాంతి బహుమతి-2025 వరించింది. గత ఏడాది డిసెంబరులో ఆమె మారువేషంలో రహస్యంగా వెనెజువెలాను వీడి నార్వేకు చేరుకున్నారు. ఆమెను తరలించేందుకు అమెరికాకు చెందిన మాజీ సైనిక నిపుణులు ఓ రహస్య ఆపరేషన్‌ చేపట్టినట్లు వెల్లడైంది. ఇది జరిగిన మరుసటి నెలలోనే మదురోను అమెరికా బలగాలు తమ దేశానికి తరలించాయి.