ముగ్గురు మహిళల మృతి బాధాకరం.. మృతుల కుటుంబాలకు ఎంపీ వంశీకృష్ణ పరామర్శ

మంచిర్యాల జిల్లా: జైపూర్ మండలం ఇందారం గ్రామంలో ప్రమాదవశాత్తు నీటి గుంతలో పడి ముగ్గురు మహిళలు మృతి చెందిన ఘటన తీవ్ర విషాదాన్ని నింపింది. ఈ దుర్ఘటనపై పెద్దపల్లి ఎంపీ గడ్డం వంశీకృష్ణ తీవ్ర విచారం వ్యక్తం చేశారు. మృతుల కుటుంబాలను పరామర్శించి, వారికి తన ప్రగాఢ సానుభూతిని తెలియజేశారు.

ఈ ఘటన నేపథ్యంలో మంచిర్యాల ప్రభుత్వ ఏరియా ఆసుపత్రి మార్చురీని సందర్శించిన ఎంపీ గడ్డం వంశీకృష్ణ, మృతదేహాలకు నివాళులర్పించారు. అనంతరం బాధిత కుటుంబ సభ్యులను ఓదార్చి, వారికి ధైర్యం చెప్పారు. ముగ్గురు మహిళలు ప్రాణాలు కోల్పోవడం అత్యంత బాధాకరమన్నారు.