ముందస్తు కార్యాచరణతోనే రైతుకు రక్షణ

తుపాను కొన్ని గంటల్లోనే తీరం దాటిపోతుంది కానీ, అది మిగిల్చే నష్టం నుంచి రైతులు కోలుకోవడానికి నెలలూ సంవత్సరాలూ పడుతుంది. తుపాను వచ్చిందంటే చేతికొచ్చిన పంట మునగడం, కోసిన ధాన్యం తడిసిపోవడం... అరటి, బొప్పాయి తోటలు నేలకొరగడం, చేపల చెరువులు దెబ్బతినిపోవడం వంటి విషాద దృశ్యాలే కనిపిస్తాయి. దీంతో అన్నదాతలకు తీవ్ర నష్టం వాటిల్లడమే కాదు, మళ్లీ సాగును ఆరంభించడానికి అప్పులు చేయాల్సి వస్తుంది. ఇటీవల ఆంధ్రప్రదేశ్‌ను తాకిన అర్నబ్, మురసు తుపానులు మరోసారి ఈ సమస్యను తెరపైకి తెచ్చాయి. మరి తుపానుల నుంచి పంటలను ఎలా కాపాడుకోగలం?

ముందస్తు తుపాను హెచ్చరికలు, బాధితులను సురక్షిత ప్రాంతాలకు తరలించడం, సత్వర సహాయక చర్యల్లో గణనీయమైన పురోగతిని సాధించాం. కానీ, పంటలనైతే కాపాడుకోలేకపోతున్నాం. ఐరాస ఆహార, వ్యవసాయ సంస్థ నివేదిక-2025 నివేదిక ప్రకారం, 1991-2023 మధ్య ప్రకృతి విపత్తుల కారణంగా ప్రపంచ సేద్యరంగానికి 3.26 లక్షల కోట్ల డాలర్ల మేర నష్టం వాటిల్లింది. సాధారణంగా తుపాను అనంతరం పంటనష్టం అంచనాలు, పరిహారం, విత్తనాల పంపిణీ, రుణ చెల్లింపుల వాయిదా వంటి చర్యలకు ప్రభుత్వాలు ప్రాధాన్యమిస్తాయి. కానీ తుపాను రాకముందే కొంత నష్టాన్ని నివారించగలిగితే రైతుకు చాలా మేలు జరుగుతుంది.