నవంబర్ 4, 5 తేదీల్లో స్కూళ్లు, ఆఫీసులకు సెలవు.. ఏపీలో ఎన్నికల నేపథ్యంలో ప్రభుత్వం కీలక నిర్ణయం!

ఆంధ్రప్రదేశ్ ప్రభుత్వం కీలక ప్రకటన చేసింది. రాష్ట్రంలో జరగనున్న ఎంపీటీసీ, జెడ్పీటీసీ ఎన్నికల నేపథ్యంలో నవంబర్ 4, 5 తేదీలను సెలవు దినాలుగా ప్రకటించింది. ఎన్నికల్లో ప్రజలు ఎలాంటి ఇబ్బందులు లేకుండా ఓటు హక్కును వినియోగించుకునేందుకు వీలుగా ప్రభుత్వం ఈ నిర్ణయం తీసుకుంది. ఈ మేరకు రాష్ట్ర పంచాయతీరాజ్, గ్రామీణాభివృద్ధి శాఖ ఉత్తర్వులు జారీ చేసింది.

రాష్ట్రంలో ఎంపీటీసీ (మండల పరిషత్ ప్రాదేశిక నియోజకవర్గాలు), జెడ్పీటీసీ (జిల్లా పరిషత్ ప్రాదేశిక నియోజకవర్గాలు) ఎన్నికల నిర్వహణకు అధికారులు అన్ని ఏర్పాట్లు చేస్తున్నారు. నవంబర్ 5వ తేదీన పోలింగ్ నిర్వహించనుండగా, నవంబర్ 7వ తేదీన ఓట్ల లెక్కింపు చేపట్టనున్నారు.