నేరాల నియంత్రణలో ప్రజల భాగస్వామ్యమే ధ్యేయం: సీపీ

ఖమ్మం: నేరాల నియంత్రణలో ప్రజల భాగస్వామ్యమే ధ్యేయంగా కమ్యూనిటీ కనెక్ట్ కార్యక్రమాన్ని నిర్వహిస్తున్నట్లు పోలీస్ కమిషనర్ సునీల్ దత్ పేర్కొన్నారు. 286 మంది పోలీస్ అధికారులు ఖమ్మం డివిజన్‌లో ఆకస్మికంగా తనిఖీలు చేయడంతో పాటు కమ్యూనిటీ కనెక్ట్ కార్యక్రమం నిర్వహించారు. ఈ సందర్భంగా 52 బ్లాక్‌లలోని ప్రతి ఇంటిని క్షుణ్ణంగా తనిఖీ చేశారు. సరైన ధ్రువపత్రాలు లేని 62 ద్విచక్ర వాహనాలు, 5 ఆటోలు స్వాధీనం చేసుకొని స్ధానిక పోలీస్ స్టేషన్‌కు తరలించారు. గంజాయి అమ్ముతున్న ఇద్దరిని, గంజాయి సేవిస్తున్న 12 మందిని, ముగ్గురు చోరీ నిందితులను, ఇద్దరు అనుమానితులను గుర్తించారు.

ఈ సందర్భంగా పోలీస్ కమిషనర్ మాట్లాడుతూ..నేర రహిత ప్రాంతాలుగా తీర్చిదిద్దాలనే లక్ష్యంతో పోలీస్ యంత్రాంగం ప్రత్యేక చర్యలు తీసుకొంటుందని తెలిపారు. ఈ ప్రాతంలో స్థానిక ప్రజలు కోరుకున్నట్లు పోలీస్ పెట్రోలింగ్ మరింత ముమ్మరం చేస్తామని చెప్పారు. యువత చెడు అలవాట్లకు బానిసలుగా మారి జీవితాలను నాశనం చేసుకోవద్దు సూచించారు. స్వీయ రక్షణ కోసం సీసీ కెమెరాల ఏర్పాటుకు స్థానికులు స్వచ్ఛందంగా ముందుకు రావాలని కోరారు.