నూలు దారం.. చక్కెర తీరం.. ప్రగతి మార్గం

ప్రచ్ఛన్న నిరుద్యోగానికి అడ్డుకట్ట వేస్తూ, రాష్ట్ర స్థూల ఆదాయాన్ని పరుగులు పెట్టించడంలో పారిశ్రామిక రంగానిదే కీలక పాత్ర. సుదీర్ఘ తీరప్రాంతం, ప్రతిష్ఠాత్మక పారిశ్రామిక కారిడార్లు, సుమారు ముప్పై లక్షల కోట్ల రూపాయల పెట్టుబడుల లక్ష్యంతో రూపొందించిన ‘నూతన పారిశ్రామిక విధానం’ ఆంధ్రప్రదేశ్‌ను పెట్టుబడుల రాజధానిగా మారుస్తున్నాయి. ఐటీ, ఏఐ సాంకేతికతల జోరు ఒకవైపు సాగుతోంది. పందలపాకలో మొలకెత్తిన వస్త్ర పరిశ్రమ నుంచి, ఏటికొప్పాకలో ప్రాణం పోసుకున్న పంచదార కర్మాగారాలు ఏపీ ప్రాథమిక ఆర్థిక వ్యవస్థను శాసిస్తున్నాయి. ఈ ప్రసిద్ధ వ్యవసాయ ఆధారిత పరిశ్రమల పరిణామ క్రమం, వాటి ప్రాముఖ్యతపై పోటీ పరీక్షార్థులు తగిన…

ఏ రాష్ట్రమైనా అభివృద్ధి పథంలో పయనించాలంటే వ్యవసాయ రంగంతోపాటు పారిశ్రామిక రంగానికి ప్రాధాన్యం ఇవ్వాలి. వ్యవసాయానికి, పరిశ్రమలకు మధ్య పరస్పర సంబంధం ఉంది. పారిశ్రామిక రంగం ఇటు వ్యవసాయానికి, అటు సేవా రంగానికి సంధానకర్తగా ఉంటుంది. వ్యవసాయధారిత పరిశ్రమలను నెలకొల్పడం వల్ల వ్యవసాయోత్పత్తులు పెరిగి ప్రచ్ఛన్న నిరుద్యోగం లాంటి సమస్యలకు పరిష్కారం లభిస్తుంది. పారిశ్రామిక ఉత్పత్తులు పెరగడం వల్ల సేవారంగంలో ఉద్యోగావకాశాలు పెరిగి నిరుద్యోగాన్ని అరికట్టడానికి, రాష్ట్ర స్థూలఆదాయం ఎక్కువ రేటుతో వృద్ధి చెందడానికి అవకాశం ఉంటుంది.