ఓ సోమన..అయ్యో పోతన

హనుమకొండ, నవంబర్‌ 14 (నమస్తే తెలంగాణ ప్రతినిధి) : తెలంగాణ తొలి ముఖ్యమంత్రి కేసీఆర్‌ ఎంతో ప్రతిష్ఠాత్మకంగా చేపట్టిన పాలకుర్తి టూరిజం సర్క్యూట్‌కు కాంగ్రెస్‌ సర్కార్‌ మోకాలొడ్డింది. అభివృద్ధి, సంక్షేమాన్ని అస్సలు పట్టించుకోని ప్రభుత్వం.. మహనీయుల గొప్పదనాన్ని నేటితరానికి అందించే పనులపైనా నిర్లక్ష్యాన్ని ప్రదర్శిస్తున్నది. తెలంగాణ గొప్పదనాన్ని తెలియజెప్పేందుకు కేసీఆర్‌ చేపట్టిన పనుల చివరి దశను సైతం పూర్తి చేసేందుకు అడ్డంకులు కలిగిస్తున్నది.

మూడేండ్లు కావస్తున్నా ప్రఖ్యాత నిర్మాణాలను పూర్తి చేయడంలేదు. తొలి కవిగా ప్రసిద్ధిగాంచిన పాల్కురికి సోమనాథుడు, మహాభాగవత రచయిత బమ్మెర పోతన మాత్యుడి స్మారక నిర్మాణ ప్రాజెక్టులను ప్రభుత్వం పట్టించుకోవడంలేదు. జనగామ జిల్లా పాలకుర్తి, బమ్మెర గ్రామాలు సోమనాథుడు, పోతన సొంత ప్రాంతాలు కావడంతో ఇకడ పర్యాటకంగా అభివృద్ధి చేయాలని 2017లో బీఆర్‌ఎస్‌ ప్రభుత్వం నిర్ణయించింది. సోమనాథుడు, పోతన ఔన్నత్యాన్ని చాటిచెప్పేందుకు 2017 ఏప్రిల్‌ 28న అప్పటి ముఖ్యమంత్రి కేసీఆర్‌ పాలకుర్తికి స్వయంగా వచ్చారు. రూ.40 కోట్లతో చారిత్రక నిర్మాణ పనులకు శంకుస్థాపన చేశారు.