ఒక గది.. ఐదు తరగతులు.. నలుగురు టీచర్లు

కర్నూలు నగరం వడ్డెగేరిలోని కేవీఆర్‌ గార్డెన్‌ ప్రాంతంలో విద్యార్థులు, ఉపాధ్యాయులు పడుతున్న ఇబ్బందులకు నిదర్శనం ఈ చిత్రం. ఇక్కడి నగరపాలక ప్రాథమిక (ఉర్దూ) పాఠశాలలో ఒకటి నుంచి ఐదు తరగతుల వరకు 97 మంది విద్యార్థులు చదువుతున్నారు. వీరికి నలుగురు ఉపాధ్యాయులు బోధిస్తున్నారు. ఈ పాఠశాల భవనం పాతది కావడంతో.. వైకాపా హయాంలో నాడు-నేడు కింద కొత్త భవనం మంజూరు చేశారు. దాంతో పాతదాన్ని కూల్చేశారు. అయితే, జగన్‌ సర్కారు నిధులు విడుదల చేయకపోవడంతో పునాది దశలోనే నూతన బడి నిర్మాణం ఆగిపోయింది.

ప్రస్తుతం ఈ పాఠశాలకు పక్కనే ఉన్న నగరపాలక ఉన్నత పాఠశాలలో ఒక గదిని ఈ విద్యార్థులకు కేటాయించారు. ఐదు తరగతులను అందులోనే నిర్వహించాల్సి వస్తోంది. ఒకేసారి నలుగురు ఉపాధ్యాయులు పాఠం చెప్పాల్సి రావడం, బడికి సంబంధించిన సామగ్రి, రికార్డులను ఇదే గదిలో వెనకవైపు పెట్టడంతో అందరూ ఇబ్బంది పడుతున్నారు. అధికారులు వెంటనే నిర్మాణాన్ని పూర్తిచేయించి, పిల్లల కష్టాన్ని దూరం చేయాలని స్థానికులు కోరుతున్నారు.