పని... పలు కోణాలు

పని చేసేవాడికి సంతృప్తి లేదు, చేయనివాడికి ఎలాగూ బాధ్యత ఉండదు. అటువంటప్పుడు వ్యవస్థ ముందుకెలా సాగుతుంది? ఇది ఒక సంస్థకో, ఒక వర్గానికో పరిమితమైన సమస్య కాదు. కుటుంబం నుంచి కార్యాలయం వరకు, పరిశ్రమల నుంచి ప్రభుత్వ వ్యవస్థల వరకు కనిపించే సవాలు. పని అవకాశాలు కల్పించడం ఎంత ముఖ్యమో, వాటిని సద్వినియోగం చేసుకునే సంస్కృతిని పెంపొందించడం కూడా అంతే ముఖ్యం.

కాలం అవకాశాలను కల్పిస్తుంది. వాటిని అందిపుచ్చుకునేవారు ఎదుగుతారు. అయితే, అందరికీ ఒకే తరహా పరిస్థితులు ఉండవు. ఉద్యోగం కోసం ఎదురుచూసేవారు, తగిన నైపుణ్యాలు లేక అవకాశాలను అందుకోలేనివారు, చేసిన పనికి గుర్తింపు లభించక నిరుత్సాహపడేవారు ఉంటారు. మరోవైపు, సామర్థ్యం ఉండీ బాధ్యతలకు దూరంగా ఉండేవారూ కనిపిస్తారు. నచ్చిన పనిచేసే అవకాశం కొందరికి దొరకదు. మరికొందరికి అవకాశమున్నా చేయాలనే ఆసక్తి ఉండదు. ఇంకొందరు పనిచేస్తున్నా తమ శ్రమకు తగిన ఫలితం దక్కడం లేదని భావిస్తారు. ఈ సమస్యలన్నింటికీ ఒకే పరిష్కారం చూపలేం. కారణాన్ని గుర్తించి, తగిన చర్యలు తీసుకోవడమే సరైన నిర్వహణ.