పేదల సంక్షేమమే ప్రభుత్వ ధ్యేయం - మంత్రి వివేక్ వెంకటస్వామి

పేద ప్రజల సంక్షేమమే ప్రభుత్వ ప్రధాన ధ్యేయమని శక్తి, గనుల శాఖ మంత్రి వివేక్ వెంకటస్వామి అన్నారు. అర్హులైన ప్రతి పేద కుటుంబానికి ప్రభుత్వ సంక్షేమ పథకాలు అందించడమే లక్ష్యంగా ప్రభుత్వం పనిచేస్తోందని తెలిపారు. సోమవారం నర్సాపూర్ మండలం తుల్జారాంపేట గ్రామ పంచాయతీ నూతన భవనాన్ని మంత్రి ప్రారంభించారు. అనంతరం నర్సాపూర్ మున్సిపాలిటీ పరిధిలోని ప్రైవేట్ ఫంక్షన్ హాల్‌లో ఎమ్మెల్యే సునీత లక్ష్మారెడ్డి, జిల్లా కలెక్టర్ ప్రతిమా సింగ్‌తో కలిసి ఇందిరమ్మ ఇళ్ల మంజూరు పత్రాలు, కల్యాణలక్ష్మి, షాదీ ముబారక్ చెక్కుల పంపిణీ కార్యక్రమంలో పాల్గొన్నారు.

ఈ సందర్భంగా గుడిసెల్లో నివసిస్తున్న అత్యంత నిరుపేద కుటుంబాలకు చెందిన 630 మంది లబ్ధిదారులకు ఇందిరమ్మ ఇళ్ల మంజూరు పత్రాలను అందజేశారు. అలాగే 412 మంది లబ్ధిదారులకు రూ.4,12,47,792 విలువైన కళ్యాణలక్ష్మి, షాదీ ముబారక్ చెక్కులను పంపిణీ చేశారు.