Prabhu Deva: తిరుమల శ్రీవారి సేవలో ప్రభుదేవా.. కుటుంబ సమేతంగా స్వామివారి దర్శనం!

వెండితెరపై తనదైన డ్యాన్స్ మూమెంట్స్‌తో ప్రేక్షకులను ఉర్రూతలూగించే ప్రముఖ కొరియోగ్రాఫర్, నటుడు, దర్శకుడు ప్రభుదేవా తిరుమల శ్రీవారిని దర్శించుకున్నారు. కుటుంబ సమేతంగా తిరుమలకు చేరుకున్న ఆయన.. శ్రీవాణి దర్శన సమయంలో స్వామివారిని దర్శించుకుని మొక్కులు చెల్లించుకున్నారు. దర్శనానంతరం ఆలయంలోని రంగనాయకుల మండపంలో వేద పండితులు ప్రభుదేవా కుటుంబ సభ్యులకు వేదాశీర్వచనం అందించారు.

ఈ సందర్భంగా ఆలయ అధికారులు శేషవస్త్రంతో సత్కరించి స్వామివారి తీర్థప్రసాదాలను అందజేశారు. అనంతరం ఆలయం వెలుపలకు వచ్చిన ప్రభుదేవాను చూసేందుకు భక్తులు, అభిమానులు ఆసక్తి చూపించారు. తమ అభిమాన నటుడిని చూసిన అభిమానులు ఆయనతో ఫొటోలు, సెల్ఫీలు దిగేందుకు పోటీపడ్డారు. దీంతో ఆలయ పరిసరాల్లో కొద్దిసేపు సందడి నెలకొంది.