ప్రవళికకు ప్రభుత్వం అండ : పొన్నం

హైదరాబాద్‌, అక్టోబర్‌ 27 (నమస్తే తెలంగాణ): ప్రయాణికురాలి దాడితో తీవ్రంగా గాయపడిన ఆర్టీసీ కండక్టర్‌ ప్రవళికకు ప్రభుత్వం అన్నివిధాలా అండగా ఉంటుందని మంత్రి పొన్నం ప్రభాకర్‌ హామీ ఇచ్చారు. దిల్‌సుఖ్‌నగర్‌లోని సాయి సంజీవని దవాఖానలో చికిత్స పొందుతున్న ప్రవళికకు మంగళవారం ఆయన పరామర్శించారు. ఈ సందర్భంగా పొన్నం మాట్లాడుతూ.. ఆర్టీసీ ఉద్యోగులకు ఏ ఇబ్బంది వచ్చినా ప్రభుత్వం అండగా ఉంటుందన్నారు. ఆర్టీసీ సిబ్బంది పట్ల ప్రయాణికులు గౌరవంగా, స్నేహపూర్వకంగా వ్యవహరించాలని కోరారు. సిబ్బంది ప్రాణాలకు ముప్పు కలిగించేలా ప్రవర్తిస్తే కఠిన చర్యలు తీసుకుంటామని హెచ్చరించారు.

డిసెంబర్‌ 9 నుంచి కుట్టుమిషన్లు మహిళలకు డిసెంబర్‌ 9 నుంచి కుట్టుమిషన్లను పంపిణీ చేసేందుకు కార్యాచరణ ప్రణాళికను రూపొందించాలని మంత్రి పొన్నం ప్రభాకర్‌ అధికారులను ఆదేశించారు. మంగళవారం సచివాలయంలో ఉన్నతాధికారులతో సమీక్ష నిర్వహించిన ఆయన బీసీ సంక్షేమశాఖలో అమలవుతున్న పథకాలపై ఆరా తీశారు. ఈ సందర్భంగా మంత్రి మాట్లాడుతూ విదేశీ విద్యా నిధి పథకానికి సకాలంలో నిధులు అందేలా చూడాలని, 38 కులాల ఆత్మగౌరవ భవనాలకు సంబంధించిన జీవోల ప్రక్రియను వేగవంతం చేయాలని ఆదేశించారు.